ကျွန်တော်နဲ့ သိပ်မတည့်တဲ့ မြို့ (၂)

လမ်းမပေါ်အတက်
လမ်းဘေးနှစ်ဘက်မှာ
စတွေ့ပါပြီ
အသွေးအသားကိုရင်း
ဈေးခင်းထားတဲ့
ကလေးမ တစ်သိုက်
ခဏတာပျော်ပိုက်
ခေါ်သူနောက်လိုက်ဖို့
သူတို့လေးတွေကျော်ရင်
ကြယ်ငါးပွင့်ဟိုတယ် အောက်က
အနောက်တိုင်း တေးဂီတအမြူးတွေနဲ့
အရူးအမူးကရင်း
ကာမဘုံကိုဆင်းမလား
ဒီထက် တဆင့်တက်
အပျိုစင် ဈေးကွက်ဆိုတာလည်းရှိသေး
ကြေးကြီးကြီးနဲ့
သရုပ်ဆောင်တွေထဲက
သဘောကျရင်လည်းရတယ်။
.
သူတို့လေးတွေကို
အပြစ်မြင်လေမလား
ကိုယ့်ခန္ဓာသွေးသား
ကိုယ်ရောင်းစားတာ
တောတောင်ပြောင်အောင်
ဖြောင်သွားတဲ့ထဲမှာ
သူတို့မပါ
သာသနာအဆောက်ဦး
သိုက်တူးသွားသူတွေလိုလဲ
မယုတ်မာ
နိုင်ငံရဲ့ သယံဇာတ
အောက်ဈေးနဲ့
ရောင်းချသွားတာ လည်းမဟုတ်
သူတို့အလုပ်က
ဆင်းရဲတွင်းရဲ့ ပြယုဂ်
ပညာရေးရဲ့ အနှတ်လက္ခဏာ
အလုပ်အကိုင် အခွင့်အလမ်းများရဲ့
မဖြည့်ဆည်းနိုင်တဲ့ သံသရာ
ငါ ... ဘာလုပ်ပေးနိုင်မလဲ
သွားမတွေးနဲ့
ဒီမြို့ထဲမှာ
ဒါဟာသဘာဝ
သဘောကျကျ မကျကျ။ ။

24 Aug 2019