ကျွန်တော်နဲ့ သိပ်မတည့်တဲ့ မြို့ (၁)

ဝင်ဝင်လာချင်း
တစ်ချို့ကတော့ တန်းစီ
တစ်ချို့ကတော့ လာခေါ်တဲ့သူနဲ့ ကျော်တက်
ဒီထက်ပိုင်ရင် VIP အပေါက်ကနေ
လူမသိသူမသိထွက်
လူတန်းစားခွဲခြားမှုတွေ စအခြေတည်တဲ့
ဒီမြို့ဆီကို
ရောက်လာရပြန်ပြီပေါ့။
.
ကိုယ့်အိတ်ကို ကိုယ်ကိုင်စရာမလို
ဆရာ ခဏသွားထိုင်
Luggage Tags တွေကို ကိုင်ပြီး
သယ်ပေးမယ့် တပည့်တွေ၊
သူတို့လေးတွေလည်း မုန့်ဖိုးရ
ကိုယ်လည်း VIP လို
မြောက်ကြွမြောက်ကြွနဲ့
ကဲ စလာပါပြီ
အရေးပါလူသားရောဂါ
ဒီမြို့ထဲ တောင်မဝင်ရသေး
ငါဆိုတဲ့အတွေးတွေနဲ့
အတ္တမြို့ရဲ့ ယစ်မူးဆေးကြီး တစ်ခွက်။
.
ဆရာဘာတွေပါသေးလည်း
ညှိပေးရမလား
ပိုက်ဆံနဲ့ အာဏာရှိရင်
ဘာပစ္စည်းမဆို
မင်းကြီးတာကထွက် အောင်လုပ်နိုင်တဲ့
စွမ်းအားတွေ
ဒါတွေကိုယစ်မူး
တခါတခါ အခန့် မသင့်လို့
ခံရဖူးတဲ့ကောင်တွေလည်းရှိရဲ့။
.
အပေါက်ဝရောက်တော့
အငှားယာဉ်မဝင်ရတဲ့ နေရာမှာ
အငှားယာဉ်မောင်းသမားတွေ ဈေးခေါ်
အော်ငေါက်နေတဲ့ လုံခြုံရေး
ထောင်တန်လေးတွေ့တော့
ယာဉ်မရပ်ရတဲ့နေရာမှာ
နေရာဦးပေးထားရှာတယ်
ဒီမြို့မှာ
ပိုက်ဆံနဲ့ အာဏာကလွဲရင်
ဂုဏ်သိက္ခာနဲ့ ကိုယ်ကျင့်တရား ဆိုတာ
ပြဒါးတစ်လမ်း သံတစ်လမ်း
ရောင်းတန်းမဝင်ခဲ့။
.
ကားထွက်ထွက်ခြင်း
သက်ပြင်းလေးချပြီး
အော် . . . ဟိုနေရာမှာပဲ
အမယ်အိုတစ်ယောက်
ခင်ပွန်းသည်ပျောက်သွားတယ်
သမီးတစ်ယောက်
အဖေပျောက်သွားတယ်
မြေးတစ်ယောက်
အဖိုးပျောက်သွားတယ်
နိုင်ငံအတွက်
မျှော်လင့်ချက်တွေပျောက်သွားတယ်
ဒါပေမဲ့
ငါ့ ဆီက ပျောက်သွားတဲ့
အရှုံးနဲ့ အမြတ်
ဈေးကွက်ကိုတွက်ရင်း
ငါဝင်လာပါပြီ
ငါနဲ့ မတည့်တဲ့
မြို့ထဲဆီကို။ ။


22 Aug 2019